آسٹریلیا کے شہر میلبورن میں جاری میگا ایونٹ میں کھیلے گئے منگل کو کوارٹر فائنل راؤنڈ میں ورلڈ نمبر ایک نوواک جوکووچ نے ٹومس برڈک کو چار سیٹس میں شکست دے کر سیمی فائنل کیلیے کوالیفائی کر لیا۔

سربین اسٹار نے اپنے حریف کو 6-1، 4-6، 6-1 اور 6-4 سے شکست دی، دوسرے سیٹ کے علاوہ جوکووچ نے پورے میچ شاندار کھیل کا مظاہرہ کرتے ہوئے اپی دھاک قائم رکھی اور لگاتار تیسری بار ٹائٹل کے حصول کی جانب اپنی پیش قدمی جاری رکھی۔

اسپین کے نامور ٹینس اسٹار اور فورتھ سیڈ ڈیوڈ فیرر نے دو سیٹ ہارنے کے بعد شاندار کم بیک کرتے ہوئے اپنے نکولس ایمبارگو کو شکست سے دوچار کر دیا۔

دونوں کھلاڑیوں کے درمیان میچ 3 گھنٹے اور 44 منٹ تک جاری رہا جس میں فیرر کی فتح کا اسکور 4-6، 4-6، 7-5، 7-6 اور 6-2 رہا۔

فیرر کا سیمی فائنل میں جوکووچ سے سامنا ہو گا۔

خواتین کے مقابلوں مین ماریاشیراپووا نے اپنی شاندار فارم کا سلسلہ جاری رکھتے ہوئے سیمی فائنل کیلیے کوالیفائی کر لیا۔

شیراپووا نے انتہائی شاندار کارکردگی کا مظاہرہ کرتے ہوئے ہم وطن اکاترینا ماکاروا کو اسٹریٹ سیٹس میں 6-2 اور 6-2 سے شکست دی۔

ایک اور میچ میں چین کی سکستھ سیڈ لینا نے عمدہ کھیل پیش کرتے ہوئے پولینڈ کی فورتھ سیڈ آگنیسکا راڈوانسکا کو سٹریٹ سیٹس میں 6-3 اور 7-5 سے ہرا کر میگا ایونٹ کے سیمی فائنل کے لیے کوالیفائی کرلیا۔